Eit opprykksjagande Sogndal fekk ikkje den midtbanespelaren dei ville ha i sommar. Men like viktig var det å halde på spelarane, deriblant Even Hovland.
Publisert: 01.09.2010 kl. 09:41 , endret: 02.09.2010 kl. 12:07
BERGEN (bt.no): – Det skjer ingenting på spelarsida i dag, sa Sogndals sportssjef Trond Fylling timar før overgangsvindauget stengde i går.
– Og det er vi faktisk veldig glade for. Det er vanskeleg både for spelar og klubb å koma inn i eit nytt lag midt i sesongen. Vi har hatt ein god vårsesong, og er glad for å ha same spelarane tilgjengelege framfor ein haust som vi gler oss veldig til, seier han.
Einaste endring i spelarstallen til topplaget i 1. divisjon er midtstoppar Vegar Gjermundstad som kom frå konkursklubben Lyn. Sogndal ville i tillegg ha ein sentral midtbanespelar, men fekk negativt svar frå Brann då dei ville hente Eirik Bakke. Det vart heller ingen låneavtale med Mikkel Diskerud frå Stabæk.
– Vi har Elvis og Furebotn på sentral midtbane som begge har hatt ein god sesong, og dessutan har vi unge Ørjan Hopen som vi vil satse for fullt på. I tillegg er Harald Stormoen på veg tilbake frå skade, seier Fylling.
Molde ville ha Hovland
Ein spelar Sogndal kunne ha mista, var Even Hovland. Sogndal og Molde har forhandla om ein overgang, men vart ikkje einige om sum.
– Økonomien samt den sportslege situasjonen i dei to klubbane med Sogndal på topp i 1. divisjon og Molde med trenarbyte og botnstrid i eliteserien, gjer at konklusjonen vert at Even Hovland spelar for Sogndal i alle fall resten av sesongen, seier Fylling.
Hovland sjølv tar situasjonen med fatning.
– Sjølvsagt var det interessant å gå til ein klubb i eliteserien dersom eg fekk sjansen, men slik vart det ikkje og slik er fotballen av og til, seier Hovland.
– Eg lagar ikkje noko problem ut av dette, eg er innstilt på å gjera ein god jobb for Sogndal ut sesongen. Eg håpar å hjelpa Sogndal til opprykk, seier Hovland som har kontrakt med Sogndal ut 2012.
Sportssjef Fylling er nøgd med innstillinga Hovland framsyner.
– Even er ein profesjonell type og har ingen problem med å akseptere at det ikkje vert noko av overgangen. Even var innstilt på eit miljøskifte no, men både han og me må vere realistiske, seier Fylling.
Fleire endringar i Løv-Ham
Løv-Ham ligg like bak kvalikplass i 1. divisjon. Hos dei har det skjedd litt meir i sommar. Bilal Velija vart løyst frå kontrakten, Mats Cato Moldskred vart seld til Bryne, Kim Rune Hellesund har vendt tilbake til Nest Sotra og Nicolai Misje er leigd ut til Fyllingen.
Inn i stallen har dei henta den unge senegalesaren Moustapha Cissé, i tillegg til Bjarte Haugsdal som er på lån frå Brann. Dessutan er Tim André Nilsen og Fredrik Heggeland henta opp frå junioravdelinga.
